Махсус хәрби операциядә вафат булган тагын бер райондашыбызны соңгы юлга озаттылар
Туганнарының авыр кайгысын уртаклашырга район башлыгы урынбасары Расих Закирҗанов, Федераль салым хезмәтенең республика идарәсе җитәкчесе урынбасары Андрей Никиташин, хәрби комиссар Фәнис Закиров килде, авыл имамы Коръән сүрәләре укып, мәрхүмнең рухына дога кылды.
Фәнил Фарсил улы Әхмәтвәлиев 1995 елның 19 сентябрендә Кызыл Мишә авылында гаиләдә беренче бала булып дөньяга килә. 2011 елда Кызыл Мишә төп мәктәбенең 9 сыйныфын тәмамлаганнан соң, укуын Тимершык урта мәктәбендә дәвам итә. 2013 елда Казан дәүләт ветеринария медицинасы академиясенә укырга керә һәм аны 2018 елда тәмамлап, «Ветеринария табибы» белгечлеге ала. 2018 елда Фәнил Фарсил улы армия хезмәтенә алына. Аннан кайткач, 2022 елга кадәр район ветеринария берләшмәсендә хезмәт куя. Теләче районының «Август» агрофирмасына күчеп, анда 3 ай гына эшләп кала. 2022 елның 25 сентябрендә мобилизация буенча махсус хәрби операциягә китә, Луганск Республикасының Сватово шәһәрендә разведротада хезмәт итә. Кызганычка каршы, 2023 елның 17 ноябрендә хәрби бурычын үтәгән вакытта батырларча һәлак була. Фәнил Фарсил улы Әхмәтвәлиев гомеренең соңгы минутларына кадәр Ватанына, хәрби антына тугры калды, хезмәт иткән дәвердә үзен кыю, батыр сугышчы итеп танытты.
Фәнил Фарсил улының Кызыл Мишә авылында әти-әнисе, 2003 елгы бертуган энесе яши. Ул әле гаилә корырга өлгермәгән була.
Мәрхүмнең якыннарының авыр кайгыларын уртаклашабыз, күркәм сабырлыклар телибез. Батыр райондашыбызның якты истәлеге безнең күңелләрдә мәңге сакланыр.
Следите за самым важным и интересным в Telegram-каналеТатмедиа
Нет комментариев