Районда федераль ташламалардан файдаланырга хокуклы 5304 кешенең 3959ы акчалата компенсация ала

Билгеле булганча, федераль ташламаларга хокуклылар 2015 елда социаль хезмәтләр җыелмасыннан (соцпакет) файдаланырга яисә аннан баш тартырга тели икән, быел 1 октябрьгә кадәр, Пенсия фондының район идарәсенә килеп, гариза язарга тиеш. Хәзерге вакытта районда федераль ташламалардан файдаланырга хокуклы 5304 кешенең 3959ы акчалата компенсация ала. Быел шуларның 31е, фикерен үзгәртеп, социаль хезмәтләр җыелмасыннан файдаланырга күчәргә гариза биргән. Шул ук вакытта бушлай дарулардан баш тартучылар да бар. Әмма мондый карарга килгәнче, ныклап уйларга киңәш ителә. Инвалидлык юкка гына бирелми. Кыйммәтле даруларга ихтыяҗ иртәгә үк туарга мөмкин. Шуңа күрә җиде кат уйлап эш итик!