Саба балыкчылары кабат Чулманда
Саба балыкчыларының Чулманга барып ярышулары – инде традиция. Бары спонсорлар гына үзгәрергә мөмкин. Быел ярышларны Сабаның танылган балыкчысы Хәмит Фәләхов истәлегенә оныклары (Радик Ибраһимов, Руслан Фәләхов, Марат һәм Айнур Ханәфиевлар, Альфред һәм Фәрит Гасыймовлар, кияүләре Әмир Корбанов) үткәрде. Расил Вәлимөхәммәтов, Алмаз Мөбарәков, Илгиз Насыйбуллин, Фәнил Сираҗиев, Фәүзия Гасыймова спонсорлар булдылар. Бәйге Хәмит Фәттах улының вафатына 20 ел булган көнгә туры китерелде.
Фотода Илнар Сөнгатуллин (сулда) һәм Сергей Васильев
Һава торышы бик шәп иде, гомумән, 13 сентябрь җәйнең иң соңгы матур көне булып калды. Ярышларда катнашучылар Чулман елгасында 30лап көймә генә санадылар, димәк, кармак салучылар тагын да күбрәк иде. Күп ярышларны оештыручы Хәниф Тимербаевның социаль челтәрнең балыкчылар төркемен гел җанландырып торуы эзсез калмаган, димәк. Араларында иң осталар 8 сәгатьтән соң ачыкланды. Балыкны иң күп тотучы булып Илнар Сөнгатуллин танылды. Зәбир Закиров белән Айдар Хәсәнов та кимен куймады. Иң зур балыкны Сергей Васильев тотты (5,5 кило). Альфред Гасыймов каптырган чуртан аныкыннан 3 килога җиңелрәк иде. Өченче урын Илһам Хаҗиәхмәтовка бирелде (1,45 кило). Иң зур судакны (900 грамм) Рамил Әхтәмов, алабуганың шәбен Марат Мостафин эләктерде. Марат Мостафин Чулманга энесе Ирекне дә алып килгән иде. Ул иң яшь балыкчы булып танылды. Иң өлкән балыкчы исемен Хәниф Хөсәенов алды.
Гомумән, ярышлардан һәм спонсорлар әзерләгән кыйммәтле призлардан барысы да канәгать калды, беренче тапкыр катнашучылар Чулман буеның матур табигате белән туганлашты.
Следите за самым важным и интересным в Telegram-каналеТатмедиа
Нет комментариев