Татарстан экспертлары бу көздә хезмәт базарының төп трендлары турында сөйләделәр

Хәзерге вакытта Татарстанда 71 мең эшсез кеше исәпләнә, ә "Россиядә эш" вакансияләр базасында төбәк буенча 43 мең буш эш урыны исәпләнә. Бу хакта ТР Хезмәт, мәшгульлек һәм социаль яклау министры урынбасары Клара Таҗетдинова сөйләде.

"Бүгенге көндә, һәр вакансиягә ике кеше дәгъва кыла. Әлеге мәгълүмати ресурс ("Россиядә эш") гомумфедераль ресурс булып тора, анда бөтен ил буенча вакансияләр урнаштырыла. Шулай итеп, Татарстан халкы башка субъектларда яраклы вакансия сайлый яки вахта ысулы шартларында эшкә урнаша ала",-дип сөйләде Клара Таҗетдинова.

Спикер билгеләп үткәнчә, хезмәт базарындагы вәзгыять атна саен үзгәрә: нинди дә булса вакансияләр ябыла, ә кайсылары барлыкка килә. Агымдагы елның 9 аенда республикада 38 меңнән артык кеше эшкә урнаштырылган. Димәк, хезмәт базарында эш бирүчеләрдән яңа вакансияләр пәйда булды.

"Нигездә, республикада эшсезлекне киметү өчен потенциал бар. Моннан тыш, эшсезләр өчен үзмәшгульләр сыйфатында теркәлү мөмкинлеге дә бар. Әлеге салым салу режимы безнең гражданнар арасында популяр булып тора" ,- дип билгеләп үтте Таҗетдинова. 

Фото: Михаил Захаров

Чыганак: sntat.ru