ХЕЗМӘТЛӘРЕ ТАУ КҮЧЕРҮГӘ ТИҢ
Соңгы елларда халыкның рәхмәтенә аеруча лаеклы һөнәр ияләре юл төзүчеләр дисәк, ялгышмабыз. Башкарган эшләре көнкүрешебезне шулкадәр уңайлы итә, көзге пычракларда да резина итекләр киюне онытып барабыз. Бүген район үзәге белән барлык авылларны асфальт юллар тоташтыра. Ел саен уннарча километр юлга ремонт ясала, милли программалар тормышка ашырыла.
Бу көннәрдә “Татавтодор”ның Саба филиалы эшчеләре Олы Ныртыдан алып Язлы Арташка кадәр арага асфальт түшәү белән мәшгуль. Барлык бригадалар да диярлек шунда. Капиталь төзекләндерү алып барыла торган участокта быел 25 миллион сумлык эш башкару планлаштырылган. 2001 елда асфальтланган дамбаны җеп белән тарттырган шикелле тигез дип әйтеп булмый. Шуңа күрә мастерлар Нияз Гәрәев, Фиргать Галәвин бригадалары иң элек юлның чыгынтылы-дугалы урыннарын киңәйтеп тигезли, Илнур Мусин, Азат Вахитов карамагындагы эшчеләр яңгыр сулары агу өчен салынган торбаларны эшлиләр, юл билгеләре, сигнал баганаларын куялар. Юл өслеген асфальт салуга әзерләү белән бәйле төп эшләрне Илнур Сабуров бригадасы башкара. Моның өчен 7 мең тонна ком, 5 мең тонна вак таш (ЩПС) ташылган, 20 меңләп тонна грунт чыгарылган. “Аннары участокка безнең эшчеләр керә. Юл 7 метр киңлектә була. Эшкә 26 сентябрьдә керешкән идек. Инде бүген 0,57 километр арага 7 сантиметр калынлыкта асфальт түшәп, транспорт хәрәкәтен кабат ачтык. Әле тагын 1,2 километрда тигезләүче катлам җәелергә тиеш. Барысы 4,2 километр участокны киләсе елга тулысы белән файдалануга тапшыру каралган”,– ди асфальт җәючеләр бригадасы мастеры Илнар Шәфигуллин. Участокта кайнашкан 20ләп техника хәрәкәтенә кайчак күз дә иярми. Тәҗрибә эшли-эшли туплана...
Тулырак язманы "Саба таңнары" газетасында укый аласыз
Автор фотолары
Следите за самым важным и интересным в Telegram-каналеТатмедиа
Нет комментариев