Татарстанда икенче миллион тонна яңа уңыш ашлыгы суктырылган.
Татарстан Республикасы Авыл хуҗалыгы һәм азык-төлек министрлыгының оператив белешмәләреннән күренгәнчә, 10 августка республикада 506,3 мең га мәйданда бөртекле һәм кузаклы культуралар җыелган, бу барлык мәйданның 34 %ын тәшкил итә.
Бүгенге көнгә республикада 2 млн. 26 мең тонна ашлык суктырылган, уңдырышлылык – 40,6 ц/га, суктырылган ашлык күләме буенча Буа районы алда бара - 110 мең тонна ашлык җыелган. Икенче урында Тәтеш районы - 97,7 мең тонна, ә өченче урында Зәй районы - 91,9 мең тонна.
Дүрт районда игеннәр фаразланган мәйданның яртысы диярлек җыеп алынган. Әлки районында бөртекле культуралар барлык мәйданның 49 %ында суктырылган, Буа районында - 46%, Нурлат һәм Апас районнарында 44 % мәйданда суктырылган. Иң югары уңыш Зәй районында - бүгенге көнгә ул 61,3 ц/га тәшкил итә. бу күрсәткеч буенча алдынгылар арасында шулай ук Тәтеш, Сарман һәм Минзәлә районнары да бар.
Татарстан Республикасы Авыл хуҗалыгы һәм азык-төлек министрлыгы белешмәләренә караганда, узган елның шул ук датасына республикада бөртекле һәм кузаклы культуралар 168,1 мең га мәйданда җыелган булган, 550 тонна ашлык суктырылган, уңдырышлылык - 32,7 ц/га.
Фото: agro.tatarstan.ru
Чыганак: agro.tatarstan.ru
Нет комментариев