Авылга кайтыгыз!
Ишле гаиләләргә ярдәм чаралары тагын да артырга мөмкин. Авылда итәк тутырып бала үстерүчеләргә торак субсидиясе бирә башламакчылар. Яшь әтиләргә исә озаграк ял итәргә тәкъдим иткәннәр.
Россия Дәүләт Думасында яңа канун проектын тикшерә башлаганнар. Аның кысасында, салада җиде һәм аннан да күбрәк бала тәрбияләүчеләрнең торак мәсьәләсен хәл итү каралган. Түбәле булуның тагын бер шарты бар: җиденче баласын тапкан яки уллыкка алганнан бирле, гаилә кимендә ун ел авылда яшәргә тиеш. Канун проекты яклау тапкан очракта, ишле гаиләләргә торак сатып алу яки яңасын төзү өчен бер тапкыр матди ярдәм күрсәтеләчәк. Йорт яки фатирның мәйданы да билгеле. Ул күпчелек төбәкләрдә гамәлдә булганча, бер кешегә 18 квадрат метрга тиң, дип аңлаткан яңалыкны тәкъдим итүчеләр. Димәк, җиде бала тәрбияләүче әти-әни 162 квадрат метрлы торакка өмет итә ала. Төзелеш бәясенә килгәндә, әлеге күрсәткеч төбәк базарында билгеләнгән уртача кыйммәттән артып китәргә тиеш түгел, ди.
Дәүләт биргән акчаны дөрес файдалануны да тиененә кадәр тикшереп торырга ниятлиләр. Документ нигезендә, субсидия алган гаилә ике ел эчендә төзелеш эшләре турында хисап тапшырып бетерергә тиеш. Яңалыкны уйлап табучылар фикеренчә, канун проекты илдәге демографик вәзгыятьне яхшыртачак. Авылда яшәргә теләүчеләр саны артачак дип тә өметләнәләр.
Сүз уңаеннан, бала тәрбияләүгә бәйле тагын бер яңалык бар. Монысы гаилә башлыкларына кагыла. Дәүләт Думасы депутаты Василий Власов яшь әтиләргә түләүле декрет ялы бирергә тәкъдим иткән. Дөрес, ун көнгә генә. Баксаң, гамәлдәге канун нигезендә, бала тугач, әтиләр биш көн ял алырга хаклы икән. Тик бу көннәр өчен акча исәпләнми. Власов әнә шул “хата”ны төзәтмәкче, күрәсең. “Бүген яшь әтиләрнең хокуклары тиешенчә якланмаган. Шуңа күрә әлеге юнәлештә эшне көчәйтергә кирәк”, – дигән ул.
Фото: http://www.vatantat.ru
Следите за самым важным и интересным в Telegram-каналеТатмедиа
Нет комментариев