“Гаилә” паркында “Татарстанда жәй” проекты кысаларында балалар өчен күңелле кичке ял узды

   Музейлар системасы хезмәткәрләре “Гаилә” паркында “Татарстанда жәй” проекты кысаларында балалар өчен күңелле кичке ял тәкъдим итте. Биредә алар агач һәм гипс эшләнмәләрен буяу буенча мастер-классларда, уеннарда катнашты, табышмакларга жаваплар эзләде, кояш, яңгырны чакыру кебек эндәшләрне искә төшерде, Сабабыз турында әзерләнгән викторинада көч сынашты.

   Программа бик бай эчтәлекле итеп төзелгән иде. Иҗади мохитне ачу йөзеннән, балаларга агач һәм гипс эшләнмәләрен буяу буенча мавыктыргыч мастер-класслар тәкъдим ителде. Сәнгать дөньясына чумган яшь рәссамнар төрле төсләр ярдәмендә гап-гади материаллардан кабатланмас сувенирлар иҗат иттеләр, кулларының осталыгын сынап карадылар һәм үз фантазияләренә ирек бирделәр.

  Актив уеннар исә сабыйларның энергиясен файдалы юнәлешкә җибәрергә ярдәм итте. Күңелле стартлар, тизлеккә һәм зирәклеккә конкурслар барышында балалар команда рухын ныгыттылар һәм дустанә атмосферада ярыштылар.

  Интеллектуаль өлеш табышмаклар чишү һәм борынгы гореф-гадәтләрне искә төшерү белән башланып китте. Музей белгечләре балаларга татар халкының җәйге йолалары турында сөйләделәр. Нәниләр күмәкләшеп эссе көндә яңгыр чакырып такмаклар әйттеләр, кояшка эндәшүләрне искә төшерделәр, шулай ук табигать цикллары һәм крестьяннар тормышында җәйнең әһәмияте турында кызыклы фактлар белделәр. Бу элементлар чарага тәрбияви-мәгърифәти характер өстәде.

«Татарстанда җәй» проекты кысаларындагы бу кичке ял гаиләләрдә милли традицияләргә карата кызыксынуны арттырды, буыннар арасындагы элемтәне ныгытты. Оештыручылар мондый интерактив очрашулар киләчәктә дә дәвам итәр, ә балалар исә туплаган белемнәрен һәм уңай хис-тойгыларын озак вакыт саклар дип ышана.