“Саф сулы ямьле Саба” экологик проектының Ике Басу Арташ ягының маршруты

Авылларның нинди урында урнашуына игътибар иткәнегез бармы? Матур урыннарны борынгы бабаларыбыз озак эзләгәннәр. Күрәсез, алар теләсә кайсы урында төпләнмәгәннәр. Авыл булып утыру өчен якында гына урманы, болыны, инеше, салкын чишмә ага торган калкулыклары булган урынны сайлаганнар.

Бүген Ике Басу Арташ авыл китапханәчесе, Арташ авыл җирлегенә кергән мәдәният йорты хезмәткәрләре белән берлектә, “Ак калфак” клуб берләшмәсе, “Җидегән чишмә” фольклор коллективы членнары катнашында бихисап кыйблага агучы чишмәләре белән дан тоткан шулар арасында авыл эшмәкәре Фаил Фархиев Кәбир бабасының якты истәлеген хөрмәт итеп яңа сулыш өргән чишмә буенда “Ширбәт” елгасы үзәнендә районыбыз китапханәләре арасында старт алган “Саф сулы ямьле Саба” экологик проекты кысаларында эстафета тапшыру бәйрәме үтте. Бәйрәм түбәндәгеләрне үз эченә алган иде: кунакларны ипи - тоз белән каршы алу, сәламләү, Гөлчара апа Фаттахова авыл тарихын сөйләп чыгыш ясады, Рәмзия апа Сабирова чишмәләр белән таныштырды, Гөлнур Вакифовна якташ шагыйрәбез Тәнзилә апа Шәрәфиева иҗатына тукталды. Бәйрәм барышында килгән кунакларга гореф-гадәтләребез, йолаларыбыздан “Кер чайкау”, “Сырлы бәләк белән носки юу”, “Каз бәбкәсе саклау”, такмаклы балачак уеннарын, “Печәнгә төшү“ йоласын, кичке су буе уеннарыннан “Бармак санашлы”, биюле “сакталы” уенын күрсәтелде. Саба үзәкләштерелгән авыл китапханәләр системасы директоры Ләйсән Ракыйп кызы Билалова тирән эчтәлекле чыгыш ясап катнашучыларга тирән рәхмәтләрен җиткерде. Эстафетаны Олы Кибәче авыл китапханә мөдире Фатихова Гөлүсә кабул итеп алды. Саф чишмә суы тутырылган эстафета графинасын уңышлар теләп аңа тапшырылды. Бәйрәм бик күңелле һәм матур үтте.

Чыганак: saby.tatarstan.ru